Rasim Mirqasım oğlu Ocaqov Şəkidə anadan olub. Ümumittifaq Dövlət Kinematoqrafiya İnstitutunun Kinooperatorluq fakültəsində (1951-1956, B.Qolovnya və L.Kosmatovun emalatxanası) və Azərbaycan Dövlət İncəsənət İnstitutunun Rejissorluq fakültəsində (1977) təhsil alıb. 1956-cı ildən “Azərbaycanfilm” kinostudiyasında quruluşçu operator, 1973-cü ildən quruluşçu rejissor kimi çalışıb. “Ocaq” müstəqil studiyasının rəhbəri (1990-2006), Azərbaycan Kinorejissorlar Gildiyasının vitse prezidenti (1999-2006) olub. Əməkdar incəsənət xadimi (1967), Çeçen-İnquş Əməkdar incəsənət xadimi (1964), Xalq artisti (1982), Azərbaycanın (1980) və SSRİ-nin (1981) Dövlət mükafatları laureatı Rasim Ocaqov 2006-cı ildə vəfat edib.