Adil İsgəndərov

Adil Rza bəy oğlu İsgəndərov (Ədil İsgəndərov) Gəncədə anadan olub. Uşaq yaşlarından dram dərnəklərində iştirak edib. Teatr Texnikumunda (1931), A.Lunaçarski adına Moskva Dövlət Teatr İncəsənəti İnstitutunda təhsil alıb. Moskvada oxuya-oxuya eyni zamanda Vaxtanqov adına teatrda işləyib. 1936-cı ildə Bakıya qayıdaraq Azərbaycan Dövlət Akademik Dram Teatrına baş rejissor, az sonra bədii rəhbər təyin olunub. Bir-birinin ardınca “Vaqif”, “Həyat”, “Fərhad və Şirin”, “Xanlar”, “Od gəlini” kimi tamaşaları səhnələşdirib. Səhnələşdirdiyi “Otello” dünyada tanınıb. Moskvada kinorejissorluq kursuna gedib. Bakıya qayıdandan sonra kinostudiyada bədii rəhbər vəzifəsinə təyin olunub, kinostudiyanın direktoru (1966-1974) olub. Ən böyük arzusu isə “Vaqif” əsərinin kino variantını çəkmək idi. 1972-ci ildə Tbilisidə keçirilən V Ümumittifaq Kino Festivalında münsiflər heyəti “Ən yaxşı aktyor” mükafatının 2 aktyora verilməsini təklif edir: Abbasqulu ağa - Həsən Məmmədova və Kərbəlayı - Adil İsgəndərova. O, mükafatdan imtina edir: “Qəmlo çox gözəl yaradılıb. Mükafat Məlik Dadaşova verilsin”. Ancaq münsiflər heyəti fikrindən dönmür. Rusiya istehsalı olan “Torpağın qanı” (1931, rejissor Mixail Averbax) və Türkiyə-Rusiya müştərək istehsalı olan “Məhəbbətim mənim, kədərim mənim” (1978, rejissor Əjdər İbrahimov) filmlərində çəkilib. Əməkdar incəsənət xadimi (1938), Xalq artisti (1943), Zaqafqaziyanın ilk SSRİ Xalq artisti (1959), SSRİ Dövlət Mükafatı (1948) laureatı Adil İsgəndərov 1978-ci ildə vəfat edib, II Fəxri Xiyabanda dəfn edilib.